Shri Ram Aarti

धनुष वाण कर सोहत नीके। शोभा कोटि मदन मद फीके॥
सुभग सिंहासन आप बिराजैं। वाम भाग वैदेही राजैं॥
कर जोरे रिपुहन हनुमाना। भरत लखन सेवत बिधि नाना॥
शिव अज नारद गुण गन गावैं। निगम नेति कह पार न पावैं॥

नाम प्रभाव सकल जग जानैं। शेष महेश गनेस बखानैं॥
भगत कामतरु पूरणकामा। दया क्षमा करुना गुण धामा॥
सुग्रीवहुँ को कपिपति कीन्हा। राज विभीषण को प्रभु दीन्हा॥
खेल खेल महु सिंधु बधाये। लोक सकल अनुपम यश छाये॥
दुर्गम गढ़ लंका पति मारे। सुर नर मुनि सबके भय टारे॥
देवन थापि सुजस विस्तारे। कोटिक दीन मलीन उधारे॥

कपि केवट खग निसचर केरे। करि करुणा दुःख दोष निवेरे॥
देत सदा दासन्ह को माना। जगतपूज भे कपि हनुमाना॥
आरत दीन सदा सत्कारे। तिहुपुर होत राम जयकारे॥
कौसल्यादि सकल महतारी। दशरथ आदि भगत प्रभु झारी॥
सुर नर मुनि प्रभु गुण गन गाई। आरति करत बहुत सुख पाई॥
धूप दीप चन्दन नैवेदा। मन दृढ़ करि नहिं कवनउ भेदा॥
राम लला की आरती गावै। राम कृपा अभिमत फल पावै॥

कन्दर्प अगणित अमित छवि नव नील नीरज सुन्दरम्।
पट पीत मानहुँ तड़ित रुचि शुचि नौमि जनकसुतावरम्॥

भजु दीनबन्धु दिनेश दानव दैत्यवंश निकन्दनम्।
रघुनन्द आनन्द कंद कोशलचन्द दशरथनन्दनम्॥

सिर मुकुट कुण्डल तिलक चारु उदारु अंग विभूषणम्।
आजानुभुज शर चाप-धर संग्राम-जित खरदूषणम्॥

इति वदति तुलसीदास शंकर-शेष-मुनि-मन-रंजनम्।
मम हृदय कंज निवास कुरु कामादि खलदल गंजनम्॥

मन जाहि राच्यो मिलिहि सो वरु सहज सुन्दर साँवरो।
करुना निधान सुजान शील स्नेह जानत रावरो॥
एही भाँति गौरी असीस सुनि सिय सहित हिय हरषी अली।
तुलसी भवानिहि पूजि पुनि-पुनि मुदित मन मन्दिर चली॥

जानि गौरी अनुकूल सिय हिय हरषु न जाइ कहि।
मंजुल मंगल मूल वाम अंग फरकन लगे॥